Туркия президенти Режеп Таййип Эрдоған мамлакати Россия ва АҚШ ўртасидаги эҳтимолий саммитни Истанбулда ўтказишга тайёр эканини маълум қилди, деб ёзади РБК.

— Бу ҳолат яна бир бор Туркия ва Истанбулнинг тинчлик йўлидаги аҳамиятини кўрсатади. Биз бундай учрашувни исталган пайтда қабул қилишга тайёрмиз. Мен [Россия президенти Владимир Путин ва АҚШ президенти Доналд Трамп ўртасидаги] Будапештдаги учрашув бўлиб ўтишини истаган эдим. Биз можарони тўхтатиш учун ҳар қандай мулоқот фойдали, деб ҳисоблаймиз. Бошидан бери шундай позицияда бўлиб келдик, бу йўлда ишладик ва адолатли тинчликка эришиш мумкинлигини айтиб келдик, — деди Туркия етакчиси.

Эрдоған шунингдек, Туркия можарога жалб қилинган икки давлат билан ҳам яхши дипломатик алоқаларга эга эканини таъкидлади.

— Бу бизга тинчлик сари йўлда устунлик беради ва биз бу имкониятни инсоният манфаати йўлида ишлатишга қатъий бел боғлаганмиз, — деди у.

Эслатиб ўтамиз, АҚШ ва Россия президентлари 16 октябрь куни телефон орқали мулоқот қилиб, янги учрашув ўтказиш борасида келишувга эришган эди. Учрашув Будапештда ўтказилиши режалаштирилган, бироқ кейинчалик Трамп уни «ҳозирча тўғри эмасдек туюлгани» сабабли бекор қилганини маълум қилган. Путин эса бу учрашув «бекор қилинмаган, балки кейинга сурилган»ини билдирган эди.