Доғистонда 23 июнь куни кечқурун Махачқалъа ва Дербент шаҳрида қуролланган номаълум шахслар православ черковлари, синагогалар ва йўл-патруль хизмати постига ҳужум қилди. Оқибатда 15 дан ортиқ полиция ходими ҳалок бўлди, жангарилар эса ўлдирилди. Доғистонда уч кунлик мотам эълон қилинди.

Доғистонлик машҳур спортчи, собиқ UFC чемпиони Ҳабиб Нурмагомедов Instagram саҳифасига жойлаган постида ҳолатни кескин қоралади ва теракт оқибатида қурбон бўлганларнинг оила аъзоларига таъзия изҳор қилди.

«Ҳалок бўлганларнинг барча оила аъзолари ва яқинларига ҳамдардлик билдираман. Аллоҳ барчамизни бундай ҳолатлардан асрасин, бошимиз узра тинч осмонимизни берсин», дейди Нурмагомедов.

Ҳабиб шунингдек, ота-оналардан фарзанд тарбиясида ўта эҳтиёткор бўлишни ҳамда улардан меҳрини аямасликни сўраган.

«Яқинларингизга ғамхўрлик қилинг, фарзандларингизнинг атрофидагиларга ва улар ким билан мулоқот қилаётганига эътибор беринг. Руҳиятни тарбиялаш тана тарбиясидан муҳимроқдир», деб ёзган спортчи.

Яна бир доғистонлик спорт устаси, енгил вазн тоифасида амалдаги UFC чемпиони ҳамда P4P рейтинги етакчиси ҳисобланган Ислом Махачев ҳам ижтимоий тармоқдаги саҳифасида одамлардан содир бўлган ҳолатни дин билан боғламасликларини сўради.

«Исломда бу каби ғайриинсоний ҳолатларнинг барчаси қораланган ва қатъиян ман этилган. Бу дин бегуноҳ одамларга зўравонлик қилишни, уларнинг шаъни ёки мулкига зиён етказишни таъқиқлайди», деган Махачев.

Унинг қўшимча қилишича, инсонга ҳеч нарса қон тўкиш ҳуқуқини бермайди, спортчи шу сабабдан вазиятни Ислом дини билан боғламасликни сўраган.