2025 йил 20 февралда қабул қилинган Ўзбекистон Республикасининг Қонуни (ЎРҚ-1032-сон) билан «Давлат божи тўғрисида»ги Қонунга бир қатор муҳим қўшимча ва ўзгартиришлар киритилди. Ушбу ўзгартиришлар иссиқлик ва электр энергиясини етказиб бериш соҳаси ҳамда чет эл тижорат ташкилотларининг аккредитациясига оид масалаларни қамраб олди.

Қонунга мувофиқ, иссиқлик ва электр энергиясини етказиб берувчиларга тегишли фуқаролик ишлари бўйича ва иқтисодий судларга даъво, ариза ёки шикоят билан мурожаат қилинганда давлат божини тўлашдан озод этиш тартиби жорий этилди. Бу ўзгартириш иссиқлик ва электр энергиясини етказиб бериш соҳасидаги талаш-тортиш масалаларини суд орқали ҳал қилишни енгиллаштиришга қаратилган. Мазкур норма, етказиб берувчиларнинг ҳуқуқларини ҳимоя қилиш ва уларнинг қарзларни ундириш жараёнида ортиқча молиявий юкни камайтиришга хизмат қилади.

Шу билан бирга, агарда иссиқлик ва электр энергиясини етказиб берувчилар томонидан берилган даъволар тўлиқ ёки қисман рад этилса, ушбу ҳолатда улардан давлат божи ундирилиши белгиланди. Бу қоида суд ишини адолатли ҳал этиш ва томонлар ўртасидаги молиявий масъулиятни таъминлаш мақсадида киритилди.

Қонун билан чет эл тижорат ташкилотларининг Ўзбекистон ҳудудидаги ваколатхоналарини аккредитация қилиш тартибига ҳам аниқлик киритилди. Энди мазкур ташкилотлар ҳар бир йил учун аккредитацияга доир давлат божини тўлашлари шарт бўлади. Бу эса чет эл ташкилотларининг мамлакатдаги фаолиятини мувофиқлаштириш ва молиявий тартиб-интизомни кучайтиришга қаратилган.

Қонун расмий эълон қилинган кундан эътиборан кучга кирди ва ушбу соҳаларда фаолият юритаётган ташкилотлар ва фуқаролар учун ҳуқуқий асос бўлиб хизмат қилади. Ушбу ўзгартиришлар энергетика соҳасидаги муносабатларни тартибга солиш ҳамда чет эл ташкилотлари билан ҳамкорлик жараёнларини яхшилашга қаратилган муҳим қадам бўлди.