Наманган вилоятдаги уч минг йиллик тарихга эга кўҳна ёдгорлик – Ахсикент харобалари негизида ташкил этилган археологик парк ҳудудида очиқ осмон остидаги музейлар барпо қилиш баробарида ер ости қазиш ишлари ҳам давом эттирилмоқда.

Ўтган ҳафта XI қазув объектида археологлар яна бир нодир хазинага дуч келишди. 10 метрга 15 метрлик режали қазув тадқиқотлари жараёнида қуйи қатламдан эрамизнинг I-II асрларига оид бўлган қизил ангобли кўзача топилди. Бу идиш табобатга оид моддалар учун мўлжаллангани айтилмоқда. Дастлабки тахминларга кўра унда симоб сақланган.

Шу жойнинг юқори қатламларида эса XI-XII асрга тегишли илмий фаолиятга оид нодир ашёлар — сиёҳдон, кимёвий моддалар ва геологик рудаларни ажратувчи устахона (лаборатория) қолдиқлари аниқланди.

— Сўнгги вақтдаги топилмалар орасида аҳолининг ижтимоий ҳаётида фойдаланилган минг йиллик мурғоби, карвонда олиб юриладиган сув идиш — фляга, нозик дид билан ишланган нақшинкор ўйинчоқлар, бешик сирли туваклари ва турли мис, бронза тангалар, металл буюмлар ҳам бор, — дейди Ахсикент археология парки дирекцияси раҳбари Анвар Икромов. — Умуман олганда, биргина жорий мавсумнинг ўзида 4 та йирик муҳандислик қурилмаси ва тўрт мингга яқин турли нодир артефактлар топилдики, уларнинг ҳар бири мозийдан берадиган хабари билан алоҳида аҳамият касб этади.

Қудратилла НАЖМИДДИНОВ

«Халқ сўзи»