Ikkinchi jahon urushining fargʻonalik afsonaviy qahramoni Mamadali Topvoldiyev Belarus oʻlkasida koʻrsatgan jasorati bilan mashhur boʻlib, u haqida oʻnlab kitoblar, hujjatli filmlar yaratilgan.

Urushdan keyingi yillarda Rishton tumanidagi Zohidon qishlogʻini har tomonlama obod boʻlishiga ulkan hissa qoʻshgan bu inson tinchlik davrida ham urush yillaridek qahramonlik koʻrsatgan edi. Uning rahbarligida viloyatning eng qadimiy va katta qishloqlaridan boʻlgan Zohidonda keng koʻlamli qurilish-bunyodkorlik ishlari olib borildi. Aynan shu insonning tashabbusi bilan oʻz davrida Zohidonga juda koʻp mashhur insonlar, xususan, birinchi kosmonavt Yuriy Gagarin tashrif buyurgandi.

Yaqinda Rishton tumanida Mamadali Topvoldiyev tavalludining 100-yilligi munosabati uning haykali tantanali ravishda ochildi. Oʻtkazilgan tadbirda qishloq nuroniylari qahramonning urush yillarida koʻrsatgan jasorati, keyingi davrdagi ezgu tashabbuslarini faxr bilan esga oldilar.

— Belorussiyada haligacha bobomni afsonaviy qahramon sifatida eslashadi, — deydi uning nabirasi Mamadali Topvoldiyev. — Bir necha marotaba bobom jang qilgan oʻlkada boʻldik. Uning avlodlariga boʻlgan hurmat va eʼtibordan boshimiz koʻkka yetdi. Men shunday qahramonning zurriyoti boʻlganimdan haqli ravishda faxrlanaman.

B.MADIYOROV,
(“Xalq soʻzi”).