Kishi oʻzi oʻqigan maktab, xat-savodini chiqargan muallimlarni tez-tez eslaydi, bolalikning shirin xotiralarini unutmaydi. Shu tuygʻu tadbirkorlik ortidan el-yurtda obroʻ orttirgan Nasriddin Suvonovga tinchlik bermadi. “Jonajon maktabim uchun bir xayri ish qilaman”, degan niyatni diliga tugdi.

Maqsadiga yetdi ham. Qorakoʻl tumanidagi “Mallaishayx” mahallasida oʻsib-ulgʻaygan bu yurtdoshimiz oʻzi tahsil olgan 20-sonli umumtaʼlim maktabining binosini mukammal taʼmirlab berdi. Oʻtgan asrning oltmishinchi yillarida qurilgan, taʼmirtalab ahvolga tushgan binoni shu kun talablariga javob beradigan zamonaviy qiyofaga keltirish uchun u oʻz hisobidan 1 milliard 200 million soʻm miqdorida mablagʻ sarfladi. 210 oʻquvchi oʻrniga ega shinamgina inshootda endilikda oʻquv samaradorligini yanada oshirish imkoniyati, oʻquvchilarning toʻlaqonli bilim olishi uchun zarur shart-sharoitlar bor. Deylik, xorijdan keltirilgan partalar oʻquvchilarning yoshiga mos tarzda sozlanadi. Bu kabi qulayliklardan pedagoglar ham mamnun.

— Bilim dargohimizdan Nasriddin Suvonovga oʻxshagan aql-zakovatli, maʼrifatparvar, dunyoqarashi keng koʻplab shogirdlar yetishib chiqqan. Ular bilan faxrlanamiz, — deydi keksa pedagog Sotiboldi Soyibov. — Sobiq oʻquvchilarimizning el orasida obroʻ-eʼtibor topib, yurtimizga qayishayotganidan koʻnglimiz ravshan tortadi. Tadbirkor shogirdimizga kelsak, uning bu ezgu amali yoshlarga ibrat, ustozlar uchun esa mukofotdir.

Istam IBROHIMOV

“Xalq soʻzi”.