Foto: Bosh prokuratura matbuot xizmati

Davlatimiz rahbarining joriy yil 8-aprel kuni Olmazor tumaniga tashrifi davomida “Yashil makon” dasturi doirasidagi ishlarni kuchaytirish, bunday ezgu tashabbusni har bir mahalla, koʻcha va xonadonda roʻyobga chiqarish bilan bogʻliq masalalar ham muhokama etildi. 

Vazirlik va idoralarga biriktirilgan hududlarda amalga oshirilishi lozim boʻlgan vazifalar aniq koʻrsatib oʻtildi.

Milliy anʼanalar va tajribalar asosida hududlarni koʻrkam, jozibali, eng muhimi, odamlarga huzur baxsh etadigan, ularning munosib yashashiga xizmat qiladigan, xalqni rozi qilishga qaratilgan mazkur tashabbusni amalga oshirish ishlari Sergeli tumanida ham boshlandi.

Jumladan, ushbu tumanga biriktirilgan Bosh prokuratura tomonidan Davlat aktivlarini boshqarish agentligi hamda «Asakabank» aksiyadorlik-tijorat banki boshqaruvi bilan hamkorlikda salohiyatli ishchi guruhi shakllantirildi va uning aʼzolari mahallalardagi obodonlashtirish va koʻkalamzorlashtirish ishlariga masʼul etib belgilandi.

Dastlab ishchi guruh tomonidan tuman sektorlari masʼullari bilan birgalikda barcha mahallalardagi koʻchalar, xonadonlar va boshqa obyektlardagi mavjud ahvol oʻrganib chiqildi.

Oʻrganishlar asosida qilinadigan ishlar, ular uchun masʼullar, muddatlar va moliyaviy manbalar aniq belgilab olindi.

Xususan, qisqa muddatlarda ekilishi lozim boʻlgan mevali va manzarali daraxtlar, gul koʻchatlariga boʻlgan ehtiyoj hisob-kitob qilinib, buyurtmalar shakllantirildi.

Bugun esa, mazkur buyurtmalar asosida keltirilgan nihollarni ekish boshlandi.

Koʻtarinkilik va uyushqoqlik bilan boshlangan hamda mamlakatimizning boshqa hududlarida ham amalga oshirilayotgan bu kabi xayrli ishlar Bosh prokuratura tomonidan doimiy muvofiqlashtirilib borilmoqda.