Foto: Madaniyat vazirligi

Oʻzbekistonning Budapeshtdagi elchixonasi koʻmagida Vengriyaning Lakitelek shahrida Alisher Navoiy byusti oʻrnatildi. Bu haqda Madaniyat vazirligi matbuot xizmati xabar berdi.

Maʼlum qilinishicha, mazkur byust Vengriya-Oʻzbekiston diplomatik aloqalari tarixida Oʻzbekistonga bagʻishlab Vengriyada ochilgan birinchi madaniy yodgorlik hisoblanadi. Ushbu loyiha vengriyalik haykaltarosh Dyordji Lantos tomonidan amalga oshirilgan.

Ochilish marosimida Vengriya davlat parlamenti spikeri oʻrinbosari Shandor Lejak, Oʻzbekiston madaniyat vaziri birinchi oʻrinbosari Avazxon Tojixonov, Vengriyadagi elchi Oybek Shaxavdinov, Oʻzbekiston xalq shoiri Usmon Azim va boshqa madaniyat hamda sanʼat vakillari ishtirok etgan. Ular Navoiy byusti poyiga gulchambarlar qoʻygan.

Shandor Lejak oʻz nutqida ikki davlat rahbarlarining siyosiy irodasi va qoʻllovi bilan hozirgi vaqtda Vengriyaning turkiy dunyo mamlakatlari, jumladan Oʻzbekiston bilan asriy rishtalari qayta tiklanayotganini yuqori baholadi.

Maʼlumot uchun, Navoiy haykali Moskva, Dushanbe, Ostona, Tokio, Minsk, Shanxay, Seul, Boku va Anqara shaharlarida oʻrnatilgan.