Joriy yil 25-mart kuni Toshkent vaqti bilan soat 04:04da “Silk Avia” mintaqaviy milliy aviakompaniyasining ikkinchi samolyoti Bangkokdan Toshkent shahriga oʻz parvozini boshladi.

Havo kemasi texnik koʻrikdan oʻtdi va toʻliq boʻyaldi, shuningdek sinov parvozlarini amalga oshirib eksport sertifikatiga ega boʻldi.

Bangkokdan Toshkentga ATR 72-600 parvozining maksimal balandligi (7600 m) va masofasini (1500 km) hisobga olgan holda, ikkinchi bort ham birinchisi kabi oltita bekatda toʻxtashni amalga oshiradi. Xususan, Tailand, Hindiston, Ummon, Misr, Kipr va Ozarbayjonda. “Silk Avia” aviakompaniyasining ikkinchi samolyoti 28-mart kuni Toshkentga qoʻnishi kutilmoqda.

Eslatib oʻtamiz, 21-mart kuni Toshkent aeroportida “Silk Avia” aviakompaniyasining birinchi ATR 72-600 samolyotini tantanali kutib olish marosimi boʻlib oʻtdi. Anʼanaga koʻra, havo kemasi tantanali ravishda suv arkasi, ekipaj aʼzolari karnay va surnay sadolari ostida gullar bilan kutib olindi. Poytaxt aeroporti perronida samolyotni Uzbekistan Airports, “Silk Avia” kompaniyasi vakillari, jurnalistlar, blogerlar va aviaspotterlar kutib olishdi.