Jahongir BOYMURODOV/“Xalq soʻzi”. Qarshi shahrida joylashgan Oʻzbekiston Respublikasi harbiy aviatsiya instituti mamlakatimizdagi harbiy uchuvchilar tayyorlaydigan eng asosiy va nufuzli taʼlim muassasasi hisoblanadi.

Mamlakatimizda davom etayotgan “Vatanparvarlik oyligi” doirasida mazkur institutda maʼnaviy-maʼrifiy tadbir tashkil etildi.

Respublika Maʼnaviyat va maʼrifat markazi Qashqadaryo viloyati boʻlimi tashabbusi bilan qator tashkilotlar hamkorligida tashkil etilgan tadbirda ishtirokchilar harbiy aviatsiya institutida yaratilgan shart-sharoitlar bilan tanishdi. Boʻlgʻusi “samo lochinlari” bilan dildan suhbat qurishdi.

— Oʻtgan yillar mobaynida mamlakatimizda milliy armiyamizni isloh qilish, kasbiy mahorati yuqori darajada boʻlgan, burchiga sodiq harbiylarni tarbiyalashning samarali mexanizmini yaratish boʻyicha juda katta ishlar amalga oshirildi, — deydi Respublika Maʼnaviyat va maʼrifat markazi Qashqadaryo viloyati boʻlimi rahbari, senator Komila Karamova. — Bu ishlarning natijasini bugun Harbiy aviatsiya institutida yaratilgan shart-sharoitlar, bu yerda taʼlim olayotgan boʻlgʻusi “samo lochinlari”ning yuz-koʻzlaridagi shijoat, faxr va iftixor tuygʻularida ham koʻrish mumkin.

Tadbir yakunida bir guruh faol ofitserlar va kursantlarga tashkilotchilar tomonidan badiiy kitoblar hamda esdalik sovgʻalari topshirildi.