Kecha, 15-dekabr kuni Yoshlar ijod saroyida “Oʻzbekiston madaniy boyligi yangi Renessans poydevori” IV Xalqaro kongressi oʻz ishini boshladi. Unda bir qator vazirlik va idoralar rahbarlari, xalqaro tashkilotlar vakillari, dunyoning 40 dan ortiq mamlakatlaridan 300 dan ortiq taniqli mahalliy va xorijiy olimlar qatnashmoqda.

Kongress Oʻzbekiston madaniy merosini saqlash, oʻrganish va ommalashtirish Butunjahon jamiyati tomonidan tashkil etildi.

Tadbirda Oʻzbekiston Respublikasi Oliy Majlisi Senati Raisining birinchi oʻrinbosari Sodiq Safoyev kirish soʻzi bilan ishtirok etib, mamlakatimizda soʻnggi yillarda amalga oshirilayotgan islohotlarga urgʻu berdi.

Xususan, jamiyatda yangi muhit yaratilgani, ommaviy axborot vositalari hamda fuqarolik jamiyati faollashayotgani, eng muhimi, odamlarda daxldorlik hissi va jamiyat taqdiri uchun masʼuliyat oshayotganini taʼkidladi.

Bundan tashqari, Oʻzbekistonning oʻz tarixiy, sivilizatsion oʻrnini yangitdan tiklash, oʻzbek xalqining genetik insoniy potensialiga monand taraqqiyot darajasini taʼminlash, uchinchi Renessans barq urish davri kelganini qayd etib, bu faqatgina shior yoki umumiy daʼvat emasligi, uning aniq yoʻnalishlari, muayyan dasturlari mavjudligi, tarixga nazar tashlab ilgarigi Renessanslar saboqlaridan xulosa chiqarib, harakatlarni zamon talablari, davr imperativlari bilan uygʻunlashtirish lozimligi toʻgʻrisida soʻz yuritdi.

Shuningdek, Renessans – inson ehtiyojlari, erkinliklari va huquqlarini taʼminlashdan boshlanishi ekanligiga urgʻu berib, uchinchi Renessans uzoq istiqbol masalasi emasligi, u bugun, ushbu onda jamiyatimiz, uning har bir hujrasida muttasil yetilib kelayotgan, real voqelik ekanligini taʼkidladi.

Kongress doirasida bir qator madaniy tadbirlar oʻtkazilishi rejalashtirilgan.