Global tahdidlar darajasini ifodalovchi “Qiyomat kuni” soati millari “yadroviy tun” boshlanishiga 89 soniya (23:58:31) qolganini koʻrsatmoqda. Yangilangan soat taqdimoti 28-yanvar kuni tashkilotning “Bulletin of the Atomic Scientists” jurnali tomonidan efirga uzatildi.

Amerika jurnali ushbu soat orqali 1947-yildan buyon har yili yadroviy xavfsizlik, iqlim oʻzgarishlari, texnologiyalar taraqqiyoti va biologik tahdidlar bilan bogʻliq xatarlardan ogohlantirib keladi. Soat millarini oʻzgartirish qarorini jurnalning direktorlar kengashi, yetakchi olimlar va tahlilchilar qabul qiladi.

“Dunyo butun insoniyatga tahdid solayotgan ekzistensial xavf-xatarlarga qarshi kurashda yetarlicha taraqqiyotga erishmagan. Shuning uchun biz soatni oldinga suryapmiz”, dedi jurnalning fan va xavfsizlik kengashi raisi Deniyel Xols.

Uning taʼkidlashicha, soat millarini oldinga surish ogohlantirish signali sifatida koʻrilishi kerak, chunki sayyora allaqachon yadroviy mojaroga yaqinlashib qolgan. Ayni damda soat “yadroviy tun”ga tarixdagi eng yaqin koʻrsatkichda turibdi.

Soat millari dastavval 23:53 da oʻrnatilgan boʻlib, ular koʻrsatgan eng bexavotir nuqta (23:43) sovuq urush tugaganidan soʻng, 1991-yilda qayd etilgandi.