Qibray tumanida kuchli taʼsir qiluvchi dori vositalari savdosi bilan shugʻullanib kelgan shaxslar ushlandi. Bu haqida Iqtisodiy jinoyatlarga qarshi kurashish departamenti xabar berdi.

Unda aytilishicha, Bosh prokuratura huzuridagi Departamentning Qibray tumani boʻlimi va boshqa huquqni muhofaza qiluvchi organ xodimlari hamkorligida tezkor tadbir oʻtkazilgan.

Tezkor tadbir davomida fuqaro D.A. 1 860 dona “PRO LIPOLYTIC” nomli kuchli taʼsir qiluvchi dori vositasini fuqaroga 1 000 AQSH dollariga sotgan vaqtida ashyoviy dalillar bilan qoʻlga olingan.

Hamkorlikda oʻtkazilgan yana bir tezkor tadbirda, muqaddam JKning 246-moddasi bilan sudlangan fuqaro A.A.ning “Maʼrifat” MFY hududidagi xonadoni koʻzdan kechirilganda, 540 dona kuchli taʼsir qiluvchi dori vositasini sotish maqsadida saqlab kelayotganligi aniqlanib, ushbu dori vositasi ashyoviy dalil sifatida rasmiylashtirib olingan.

Hozirda mazkur holatlar yuzasidan Jinoyat kodeksining 251-1-moddasi (giyohvandlik vositalari, ularning analoglari yoki psixotrop moddalar hisoblanmaydigan kuchli taʼsir qiluvchi moddalarni targʻib qiluvchi mahsulotni tayyorlash, tarqatish, reklama qilish, namoyish etish yoki bunday moddalarni yoxud zaharli moddalarni qonunga xilof ravishda muomalaga kiritish) bilan jinoyat ishi qoʻzgʻatilib, tergov harakatlari oʻtkazilmoqda.