Termiz shahridagi 9-maktab bugun muhim maʼrifiy tadbirga mezbonlik qildi. Oʻzbekiston Respublikasi Prezidenti Shavkat Mirziyoyevning “Jahon miqyosidagi davlat va siyosat arbobi” nomli kitob-albomini hududlarga yetkazish jarayoni aynan shu taʼlim dargohidan boshlandi. Mazkur nashrning butun mamlakat boʻylab “maʼrifat va tarbiya karvoni” sifatida yoʻnaltirilayotgani uning ahamiyatini yanada oshiradi.

Tadbirda Surxondaryo viloyati hokimi Ulugʻbek Qosimov, taʼlim sohasi masʼullari hamda shahar va tumanlardan tashrif buyurgan rahbarlar ishtirok etdilar. Marosimda 15 ta tuman va shahar Maktabgacha va maktab taʼlimi boʻlimlari rahbarlariga kitob-albomlarning ilk toʻplami tantanali ravishda topshirildi. Shu bilan birga, Prezident asarlaridan iborat “Maʼrifat karvoni” rasman yoʻlga chiqib, viloyatning barcha hududlariga yoʻnaltirildi.

Surxondaryo viloyati boʻyicha jami 967 ta maktabga 1774 ta kitob-albom yetkazilishi rejalashtirilgan. Ushbu noyob nashr oʻquvchilarda yetakchilik, masʼuliyat, vatanparvarlik, keng fikrlash va faol fuqarolik pozitsiyasini shakllantirishda muhim manba vazifasini bajaradi.

Kitob-albomlar taʼlim muassasalariga yetkazilgandan soʻng “Kelajak soatlari”, maktab kutubxonasi fondlari, tarbiyaviy va maʼrifiy tadbirlarda qoʻshimcha oʻquv manbai sifatida keng qoʻllaniladi.

Mazkur tashabbus yoshlarning tafakkurini boyitish, ularni yangi gʻoyalar, masʼuliyat va ezgu maqsadlar bilan ruhlantirishga qaratilgani bilan yuksak ahamiyat kasb etadi.

Farhod ESONOV, “Xalq soʻzi”.