Bengal adabiyoti deganda koʻz oldimizda avvalo Kazi Nazrul Islom gavdalanadi. Shoir Erkin Vohidovning u kishiga bagʻishlab yozgan “Ruhlar isyoni” sheʼri bugungacha tillarda doston. Ushbu adabiy koʻprik bugun yana bir qadar jonlandi, desak mubolagʻa boʻlmaydi.

Oʻzbekiston Yozuvchilar uyushmasida bengal va ingliz tillariga tarjima qilingan oʻzbek mumtoz adabiyoti hamda zamonaviy sheʼriyat namoyandalari vakillarining sheʼr va hikoyalari jamlanma-kitob taqdimoti boʻlib oʻtdi. Tadbirda uyushma aʼzolari, yosh ijodkorlar, tarjimonlar hamda OAV vakillari ishtirok etdi.

“Selections from Uzbek literature translated into Bangla and English” nomli tarjimalar toʻplamiga yuzga yaqin shoir va yozuvchilarning ijod namunalari kiritilgan. Taqdimotda yurtimizdagi tarjima faoliyatiga qaratilgan eʼtibor, ikki davlatning oʻzaro adabiyo aloqalari xususida soʻz yuritildi. Shuningdek, tadbir mobaynida taniqli shoirlar va yosh ijodkorlar tomonidan mushoira oʻtkazildi.

— Toʻplam chop etish loyihasi birinchi marta tashkil etilgani sabab kamroq nusxada chop etdik. — deydi Bangladesh davlatining Oʻzbekistondagi Favqulodda va Muxtor elchisi Mosud Mannan. — Ammo loyiha kelgusida yana davom etadi, yaʼni har ikki yilda bir oʻzbek adabiyoti namoyandalarining ijodiy ishlarini bengal va ingliz tillariga oʻgirib, kitob holida chop etib borishni rejalashtirganmiz. Shuningdek, kitoblarni koʻproq nusxada nashr etib, barcha adabiyot ixlosmandlariga yetkazish niyatidamiz.

Yulduz OʻRMONOVA,

“Xalq soʻzi”.