Videodan kadr

Adliya vazirligi tashabbusi bilan noqonuniy poygalarni tashkil etganlik va unda ishtirok etganlik uchun maʼmuriy va jinoiy javobgarlik choralarini nazarda tutuvchi qonun loyihasi ishlab chiqilgan. Bu haqda “Huquqiy axborot” Telegram kanalida xabar berildi.

Qayd etilishicha, bugungi kunda yoʻllarda noqonuniy tashkil etilayotgan poygalar yoʻl harakati ishtirokchilarining xavfsizligiga, aholining osoyishtaligiga jiddiy xavf solib, inson oʻlimigacha boʻlgan oʻta salbiy oqibatlarga olib kelmoqda. Bu esa, aholining, shu jumladan yoʻl harakati ishtirokchilarining haqli eʼtirozlari va xavotirlariga sabab boʻlmoqda.

Shuni inobatga olib, Adliya vazirligi yoʻllarda noqonuniy poygalarni tashkil etish oqibatida vujudga kelayotgan yoʻl-transport hodisalarini oldini olish maqsadida maʼmuriy va jinoiy javobgarlikni joriy etishni nazarda tutuvchi qonun loyihasini ishlab chiqib, manfaatdor vazirlik va idoralarga kelishish uchun kiritgan.

Bildirilishicha, mazkur qonun loyihasi joriy yilning 17-fevral kuni manfaatdor vazirlik va idoralarga kelishishga chiqarilgan boʻlib, belgilangan tartibda kelishilganidan soʻng, jamoatchilik muhokamasiga qoʻyiladi.