Surxondaryoning mehnatkash mirishkorlari har yili qishloq xoʻjaligi mahsulotlarini birinchilardan boʻlib bozorga yetkazib keladi. Joriy yilda ham Muzrabot tumani dehqonlari aholining asosiy oziq-ovqat mahsulotlaridan biri — piyoz hosilini yigʻib olishni boshladi.

Jumladan, “Mehnatobod” mahallasida “Bir mahalla — bir mahsulot” tamoyili asosida piyoz yetishtirish tizimli yoʻlga qoʻyilgan. Ayni paytda dalalarda sabzavot pishib yetilgan.

Mahallada jami 855 ta xonadon mavjud boʻlib, ularning qariyb 95 foizi piyoz yetishtirish bilan shugʻullanadi. Bu esa sabzavotchilik mahalla aholisi uchun barqaror daromad manbaiga aylanganini koʻrsatadi.

— Tomorqadan toʻgʻri foydalanilsa, u koni foyda, — deydi Xoliqnazar Boymatov. — Tomorqamizning 20 sotix yer maydonida piyoz yetishtirdik. Joriy mavsumda 30 tonnagacha hosil olishni rejalashtirib turibmiz. Hisob-kitobimiz boʻyicha 100 million soʻmgacha daromad olishni koʻzlayapmiz.

Ayni kunlarda mahallada piyoz yigʻim-terimi qizgʻin pallaga kirgan. Yetishtirilgan mahsulotlar bosqichma-bosqich ichki va tashqi bozorlarga yetkazib berilmoqda.

Farhod ESONOV, “Xalq soʻzi”.