Joriy yilning avgust oyida “Oʻzbekgidroenergo” AJ va jahonning yetakchi oliy taʼlim muassasalaridan biri — AQSHning Jon Xopkins universiteti oʻrtasida hamkorlikka oid memorandum imzolangan edi. Yevropa tadqiqot instituti modeliga asoslangan birinchi AQSH universiteti sifatida tanilgan mazkur taʼlim dargohi doimiy ravishda dunyodagi eng nufuzli ilmiy markazlari qatorida qayd etilmoqda.

Imzolangan memorandum energetikada barqaror rivojlanish, korporativ boshqaruvni takomillashtirish, ESG tamoyillari (ekologik, ijtimoiy va korporativ boshqaruv) asosida faoliyat yuritish hamda ilgʻor xalqaro tajriba almashinuviga qaratilgan.

Hamkorlik doirasida xalqaro treninglar va oʻquv kurslari — barqaror rivojlanish, ESG standartlari, moliyaviy va nomoliyaviy hisobotlar, korporativ boshqaruv sohalarida bilim hamda koʻnikmalarni oshirish, qoʻshma tadqiqot loyihalari — gidroenergetika va “yashil” texnologiyalarga oid innovatsion yechimlar ishlab chiqish kabi muhim tashabbuslar amalga oshirilayotir.

Mazkur memorandum ijrosi “Oʻzbekgidroenergo” AJning xalqaro imijini mustahkamlash, investitsiya muhitini yanada yaxshilash va ekologik jihatdan barqaror gidroenergetika tizimini rivojlantirishda muhim ahamiyat kasb etadi.

“Xalq soʻzi”.