Isroil havo kuchlari Yamanda husiylar bilan bogʻliq bir qator obyektlarni nishonga oldi. Armiya maʼlumotiga koʻra, Sana shahridagi prezident saroyi hududida joylashgan harbiy inshoot, shuningdek, guruhni taʼminlash uchun ishlatilgan elektr stansiyalari va yoqilgʻi omborlariga zarba berilgan.

Rasmiy Tel-Aviv bu hujumni husiylarning soʻnggi raketa otishlariga javob sifatida izohladi. Ular 22-avgust kuni birinchi marta kasseta oʻq-dorilaridan foydalangani, ammo Isroil havo mudofaasi raketalarni yoʻq qilgani qayd etildi.

Husiylar nazoratidagi “Al-Masira” telekanali ham elektr stansiyasi va yoqilgʻi omboriga urilgan zarbalarni tasdiqladi. Shu bilan birga, Al Jazeeraning xabariga koʻra, hujumlar oqibatida 6 kishi halok boʻlgan, 86 nafar inson yaralangan. Biroq bu raqamlar mustaqil manbalar tomonidan hali tasdiqlanmagan.

Maʼlumki, 2023-yil kuzida Gʻazo sektorida urush boshlangach, husiylar muntazam ravishda Isroilga dron va raketalar yoʻllab, HAMASni qoʻllab-quvvatlashlarini maʼlum qilib kelmoqda. Isroil esa bunga javob tariqasida Yamandagi guruhning harbiy infratuzilmasi bilan bogʻliq obyektlariga zarba bermoqda.