Ijtimoiy tarmoqlarda Surxondaryo viloyati Denov tumanidagi “zapravka”da gaz toʻldirayotgan “Kamaz”da yongʻin sodir boʻlgani toʻgʻrisida xabarlar keng tarqaldi. mazkur holat yuzasidan Favqulodda vaziyatlar vazirligi maʼlumot berdi.

Unda aytilishicha, holat bugun, 7-aprel kuni soat 08:24 da Denov tumani, “Oqtom” MFYda joylashgan avtomobillarga suyultirilgan gaz quyish shoxobchasi hududida sodir boʻlgan.

Unda “Kamaz” rusumli suyultirilgan (propan) gaz tashuvchi maxsus avtomobildan sigʻimga gazini quyish vaqtida sigʻimda chaqnash sodir boʻlib, natijada yongʻin kelib chiqqanligi toʻgʻrisida “112” tizimidan Surxondaryo viloyati FVBga xabar kelib tushgan.

Mazkur murojaatga asosan hodisa joyiga 5 ta qutqaruv boʻlinmalari soat 08:39 da yetib borib, yongʻin soat 08:42 da oʻrab olingan va soat 10:10 da toʻliq oʻchirilgan.

Dastlabki maʼlumotga koʻra, sigʻimning yorilishi sababi maxsus avtomobildan propan gazini boʻshatish vaqtida texnologik jarayonning buzilishi deb taxmin qilinmoqda.

Hozirda voqea joyiga viloyat FVB rahbar xodimlari, Denov tumani IIB, SSB, “Hududgaztaʼminot” rahbar va xodimlari chiqishgan hamda hodisaning kelib chiqish sabablarini aniqlash ishlari olib borilmoqda.