Foto: Muhsin Umurzoqov / “Xalq soʻzi”

2025-yil 1-dekabrdan Oʻzbekiston qonunchiligida bir qator oʻzgarish va yangiliklar kuchga kiradi. Quyida ushbu oʻzgarishlarga qisqacha toʻxtalamiz:

Ekologiya boʻyicha maʼlumotlar ochiq boʻladi

Oʻzbekiston Atrof-muhitga taalluqli masalalar boʻyicha axborotdan foydalanish, qarorlar qabul qilish jarayonida jamoatchilikning ishtiroki va odil sudlovga erishish toʻgʻrisidagi Konvensiyaga (Orxus konvensiyasi, Orxus shahri, Daniya, 25.06.1998-y.) qoʻshilganligi munosabati bilan Ekologiya vazirligi atrof tabiiy muhit davlat monitoringi maʼlumotlar bazasining jamoatchilik uchun ochiqligini taʼminlaydi va unga quyidagi maʼlumotlarni joylashtiradi:

• “Yashil makon” umummilliy loyihasi doirasida har yili ekiladigan daraxtlar va koʻchatlar (ularning manzili, parvarishi uchun masʼul shaxslar, koʻchat turlari va boshqalar) toʻgʻrisida;
• davlat oʻrmon fondiga kirmaydigan daraxtlar va butalarni kesish uchun ruxsat etish xususiyatiga ega hujjatni olish maqsadida yuridik va jismoniy shaxslar tomonidan taqdim etilgan arizalar (ariza beruvchilar, daraxtlar soni, ularning turlari va manzillari toʻgʻrisida) va daraxtlarni kesish boʻyicha oʻtkaziladigan jamoatchilik eshituvlari (sanasi, vaqti, manzili va natijalari toʻgʻrisida);
• suv havzalarida noruda materiallarni oltin izlovchilar usulida qazib olish boʻyicha joriy etilgan moratoriy tartibini buzgan shaxslar toʻgʻrisida va boshqalar.

Seysmologik onlayn platforma ishga tushirilmoqda

Platforma quyidagilarni oʻz ichiga oladi:

• ehtimoliy zilzilalarning mintaqaviy akselerogrammalari bazalari;
• respublika hududlarini ilmiy tahlillar asosida seysmik xavflilik darajasi boʻyicha tasniflashni nazarda tutuvchi umumiy seysmik va batafsil rayonlashtirish xaritalari;
• respublikada mavjud boʻlgan faol tektonik yoriqlar xaritalari.

FHDYO organlariga taqdim etiladigan hujjatlar soni qisqarmoqda

Quyidagilarga talab bekor qilinadi:

• nikohlanuvchi shaxslarda FHDYO organlari tomonidan nikoh qayd etilganda, tibbiy koʻrik natijalari taqdim etilganda, shuningdek, nikohdan ajralishda sudning hal qiluv qarori qabul qilinganda;
• respublika hududida notarial tasdiqlangan nikoh shartnomalari asl nusxalarini notariuslar tomonidan ularning nusxasini “Notarius” ATga majburiy yuklash tartibini joriy etish hisobiga.

Chorvador va parrandachilarga subsidiyalar

2025-yil 31-dekabrga qadar davlat tomonidan quyidagilarga subsidiyalar ajratiladi:

• chorvachilik mahsulotlari yetishtiruvchi xoʻjaliklarga – xorijiy davlatlardan import qilingan nasldor qoramollarning har bir bosh soni uchun 2 mln soʻmdan, nasldor qoʻy va echkilarning har bir bosh soni uchun 400 ming soʻmdan;
• parrandachilik xoʻjaliklariga – bir kunlik naslli joʻjalarning har bir donasini import qilish bilan bogʻliq xarajatlarni qoplash uchun 15 ming soʻm.

Barcha mahallalar – bitta reyestrda

2025-yil 1-noyabrda yakunlangan mahallalar auditi natijasida ular toʻgʻrisida toʻplangan ishonchli va dolzarb maʼlumotlarni oʻz ichiga olgan mahalla fuqarolar yigʻinlarining yagona reyestri ishga tushiriladi.

“Fuqarolik jamiyati haftaligi”

Dekabr oyining birinchi kunlarida “Fuqarolik jamiyati haftaligi” boshlanadi. Uning doirasida “Fuqarolik jamiyatini rivojlantirishga qoʻshgan hissasi uchun” koʻkrak nishoni bilan taqdirlash tadbirlari oʻtkaziladi. Haftalikni oʻtkazish Prezidentning 26.08.2024-yildagi PF-124-son Farmonida nazarda tutilgan.

Qishloq xoʻjaligini raqamlashtirish

Yaylovlardan samarali foydalanishni nazarda tutuvchi “E-yaylov” elektron platformasi ishga tushirilmoqda.

31-dekabrda nimalar tugaydi

Quyidagi xarajatlarning bir qismini qoplash tugaydi:

• Biznesni rivojlantirish banki huzuridagi Kichik biznesga koʻmaklashish markazlari yordamida ishlab chiqilgan loyihalar doirasida import qilinadigan asbob-uskunalarni sugʻurtalash, shuningdek, xomashyo va materiallarni sertifikatlash boʻyicha;
• investorlarga 2025-yil 31-dekabrga qadar foydalanishga topshirish sharti bilan yangi osma dor yoʻllarini qurish va jihozlashga yoʻnaltirilgan har 500 metr yoʻl uchun 1 mlrd soʻmdan, dor yoʻllari uzunligi kamida 500 metr boʻlganda;
• 2019-yil 5-yanvardan 2024-yil 31-martga qadar yangi mehmonxona va boshqa mablagʻlarni qurish va foydalanishga topshirishni amalga oshirgan tadbirkorlik subyektlariga.