Украина президенти Владимир Зеленскийнинг ўзбекистонлик қиёфадоши, айни пайтда Москвада истиқомат қилаётган Умид Исабоев “Квартал-95” муаллифлик украин шоусига таклиф қилинди.

Аслида автомобилларни бўяш билан шуғулланадиган Умид Исабоев Mash манбасига берган интервьюсида у билан шоу раҳбари Евгений Кошевойнинг шахсан ўзи боғланганини айтиб ўтган. Саҳнадан кетган Зеленскийнинг собиқ ҳамкасби ҳамюртимизга Украина телевидениесида кўрсатувни биргаликда олиб боришни таклиф қилган.

- Менга видеоқўнғироқ қилишди. Қарасам, Украина рақами. Маълум бўлишича, Евгений Кошевой телефон қилаётган экан. У менга кел, сени олиб кетамиз, бизга қўшил, биз томонларга кел. Билсам, “Квартал-95”дан телефон қилишибди. Бирга ишлаймиз, дейди. Кошевой билан кўрсатувни бирга олиб бориш, одамларни кулдириш, - дейди Умид.

Исабоев журналистлар билан биринчи интервьюсидан кейин тасвирга тушиш бўйича кўплаб таклифлар келиб тушаётганини билдирган. Хусусан, унга Россия сериалида роль таклиф этилган. Бу борада шартнома ҳам имзоланиши мумкин экан. Аммо “Квартал-95” таклифи инобатга олинса унинг олдида қийин танлов турибди. Умиднинг ўзи эса “Квартал-95” шоусида ишлашни истаётганини билдирган.