Фото: "Халқ сўзи"

Ботир МАДИЁРОВ/«Халқ сўзи». Айни кунларда мамлакатимизнинг барча ҳудудларида истеъдодли йигит-қизларни аниқлашга қаратилган «Ёшлар овози» танловининг ҳудудий босқичлари бўлиб ўтмоқда.

Вазирлар Маҳкамасининг жорий йилнинг 16 февралдаги мажлиси баёнига кўра, янги авлоднинг бўш вақтини мазмунли ўтказиш мақсадида 15-30 апрель кунлари юртимиз бўйлаб «Беш ташаббус олимпиадаси» доирасида «Ёшлар овози» танлови ўтказиляпти. Танловда иштирокчилар мақом, бахшичилик, анъанавий ижро, опера ва эстрада йўналишлари бўйича ўз маҳоратларини намойиш этишмоқда.

17-18 апрель кунлари Фарғона шаҳрида танловнинг вилоят босқичи ташкил этилди. Унда 5 та йўналиш бўйича ғолиб бўлган йигит-қизлар танловнинг республика босқичида иштирок этиш ҳуқуқини қўлга киритди.

— Ёшлар ишлари агентлиги томонидан 2021 йили таъсис этилган ушбу танловнинг якуний босқичида қатнашиш орзуим эди, — дейди бахшичилик йўналиши ғолиби Гулрухсор Жўраева. — Бу йил Қорақалпоғистон Республикасининг Бўзатов туманида бўлиб ўтадиган танловнинг республика босқичида ўз истеъдодимни намоён этиш имконига эга бўлганимдан мамнунман.