Бош прокуратура ҳузуридаги Департаментнинг Учтепа тумани бўлими ходимлари томонидан тадбиркорлик субъектларининг ҳуқуқларини ҳимоя қилиш юзасидан тезкор тадбир ўтказилди, деб хабар бермоқда Иқтисодий жиноятларга қарши курашиш департаменти.

Унда айтилишича, ўтказилган тезкор тадбир давомида фуқаролар С.Н. ва бошқалар яширин цех ташкил қилиб, «М.А.» МЧЖ томонидан ишлаб чиқариладиган «Арсенал» номли пайвандлаш электродининг қалбаки нусхасини ишлаб чиқариб, фуқаро Н.С.га 66 қути қалбаки электродни сотган вақтида ашёвий далиллар билан қўлга олинган.

Тезкор тадбир давомида, яширин цехдан умумий баҳоси 855 миллион сўмлик 17 турдаги 36 минг 760 қути электрод, маҳсулот ҳақида маълумот берувчи қалбаки штрих код маркировкалар ва бошқа ишлаб чиқаришда фойдаланилган товар моддий бойликлари ашёвий далил сифатида расмийлаштирилган.

Ҳозирда мазкур ҳолат юзасидан Жиноят кодексининг 168-моддаси (фирибгарлик) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилиб, тергов ҳаракатлари бошлаб юборилган.