Яккабоғ туманида таниқли биотехнолог олим, Ўзбекистон Фанлар академияси академиги Асқар Холмуродовнинг ҳаёти ва фаолиятига бағишланган хотира кечаси бўлиб ўтди.

Тадбирда Республика Маънавият ва маърифат маркази Қашқадарё вилоят бўлими раҳбари, сенатор Комила Каромова, Яккабоғ тумани ҳокими ўринбосари Фозил Хидиров, нуронийлар, таълим муассасалари ходимлари, ёшлар ҳамда кенг жамоатчилик вакиллари иштирок этди.

Хотира кечасида сўзга чиққанлар томонидан таъкидланганидек, Асқар Холмуродов 1939 йилда Қашқадарё вилоятининг Яккабоғ туманида туғилган, Ўрта Осиё давлат университетини тамомлаб, умрини биология ва биотехнология фанлари ривожига бағишлаган. Олим 1989 йилда Ўзбекистон Фанлар академияси академиги этиб сайланди. У Қашқадарё вилоятидан етишиб чиққан биринчи академик ҳисобланади.

Асқар Холмуродов узоқ йиллар давомида Микробиология институти директори, Фанлар академияси вице-президенти лавозимларида самарали фаолият юритган.

Олимнинг илмий ишлари микроорганизмлар биотехнологияси, биокимё ва экологик хавфсизлик йўналишларида катта аҳамият касб этган. Асқар Холмуродов раҳбарлигида ўнлаб фан номзодлари ва докторлар тайёрланган, у яратган илмий мактаб бугунги кунда ҳам ўз фаолиятини давом эттирмоқда.

Тадбир иштирокчилари Асқар Холмуродовнинг ҳаёт йўли ёш авлод учун ҳақиқий ибрат мактаби эканлиги, у ўз илмий фаолияти орқали нафақат мамлакатимиз, балки жаҳон биотехнология илмида ҳам ўз изини қолдирганини эътироф этишди.

Жаҳонгир БОЙМУРОДОВ

«Халқ сўзи».