Одилбек Одамбоев/«Халқ сўзи». Қадимий ва навқирон Хивада Ўзбекистон – Ҳиндистон ёшлар форуми ва Марказий Осиё – Хитой ёш иқтидорлар форуми ташкил қилинди. Унда савдо-иқтисодий, инвестициявий, маданий-маърифий соҳаларда яқин ҳамкорлик ўрнатилган ушбу мамлакатлар ёшлари ўртасида ўзаро алоқаларни мустаҳкамлаш бўйича қатор таклиф ва ташаббуслар билдирилди.

Форум доирасида Инновациялар миллий офиси томонидан «Барқарор ривожланиш ва атроф-муҳит инновациялари» мавзусида панель муҳокамалар бўлиб ўтди. Форум қатнашчилари Хивадаги Ичанқалъа мажмуасининг тарихий обидалари, музей экспонатлари билан танишди. Театр ижодкорлари томонидан саҳналаштирилган «Султон Жалолиддин» спектаклини томоша қилишди.

— Ўзбекистонга биринчи бор келишим, — дейди хитойлик талаба Чжан Хенчжи. — Ичанқалъанинг бетакрор обидаларини кўриб, ўзимни эртаклар оламига тушиб қолгандек ҳис қилдим. Хивада ўтказилган Марказий Осиё – Хитой ёш иқтидорлар форумида ўзбек талабалари орасидан кўплаб дўстлар орттирдим. Самимий меҳмондўстлик учун чин дилдан миннатдорчилик билдираман. Ўзбекистонлик тенгдошларимни Хитойга таклиф қиламан.