Фото: Reuters

Исроил мудофаа кучлари гаровга олинганлар озод этилганидан кейин ҳам Ғазо секторида Фаластиннинг ҲАМАС радикал гуруҳига қарши операцияларни давом эттиради. Бу ҳақда Исроил Фавқулодда ҳарбий ҳукумати вазири, мамлакат Мудофаа вазирлигининг собиқ раҳбари Бенни Ганц айтиб ўтди.

“Агар гаровга олинганларнинг қайтиши учун танаффус бўлса ҳам, биз қайтиб, бор кучимиз билан душманга зарба берамиз. Ҳозирда операция кенгаймоқда, мустаҳкамланмоқда ва чуқурлашмоқда”, — деди у.

Ганц аввалроқ Исроил Ғазо ва бутун дунёда ҲАМАС етакчиларини таъқиб қилишини айтган эди.

Олдинроқ, Туркия президенти Режеп Таййип Эрдоған Исроил ўн мингга яқин Фаластин фуқаросини асирда ушлаб турганини айтганди.

“Исроил ўн мингга яқин фаластинликни гаровда ушлаб турибди. Германия бу одамларни озод қилиш учун чоралар кўрсин, кейин биз ҲАМАС қўлидагиларни озод қилиш учун ҳаракат қиламиз”, деди Эрдоған. Унинг сўзларига кўра, Германия бундай қадамга рози бўлмаган. 

Ғазо секторидаги қарама-қаршилик шу йилнинг 7 октябрь куни бошланди. Шу куни эрталаб ҲАМАС Исроилга қарши “Ал-Ақса тўфони” деб номланган ҳарбий операция бошлади ва ҳаводан зарбалар берди. Минглаб жангарилар яҳудийлар давлати ҳудудига бостириб кириб, ўнлаб ҳарбий техника ва юздан ортиқ инсонни гаровга олди.

Шундан сўнг Исроил Бош вазири Бинямин Нетаньяху мамлакат уруш ҳолатида эканлигини эълон қилди. Мамлакат мудофаа кучларининг жавоб операцияси “Темир қиличлар” деб аталди ва унинг мақсади ҲАМАСни йўқ қилиш ҳисобланади.