Аҳмад Фарғоний номидаги вилоят ахборот-кутубхона марказида ҳафталик доирасида ногиронлиги бўлган шахслар томонидан тайёрланган маҳсулотларнинг кўргазма-савдо ярмаркаси ташкил этилди.

Тадбирда шаҳар ва туманлардан келган 60 нафарга яқин ҳунарманд 1 200 дан ортиқ турдаги ранг-баранг маҳсулотлари билан иштирок этди. Қатнашчиларга маҳорати баланд усталар томонидан тайёрланган ҳунармандчилик буюмлари, миллий либослар, турли тақинчоқ ва безаклар, кундалик рўзғор учун мўлжалланган маҳсулотлар намойиш этилди.

— Ярмарка ва унинг доирасида ташкил этилган аукцион савдосида 100 миллион сўмдан ортиқ маҳсулотлар сотилиб, ушбу маблағлар тўғридан-тўғри ногиронлиги бўлган ҳунармандларнинг ижтимоий карталарига ўтказиб берилди, — дейди Ижтимоий ҳимоя миллий агентлигининг Фарғона вилояти бошқармаси бошлиғи ўринбосари Ҳикматилло Холиқов. — Қувонарлиси, харидорлар томонидан сотиб олинган 18 турдаги маҳсулотлар ноёб экани, ўхшаши йўқлиги таъкидланди.

Айтиш жоиз, ҳафталик доирасида бундай тадбирларни вилоятнинг барча шаҳар ва туманларида ўтказиш, унга ногиронлиги бор шахслар, ҳунарманд ва тадбиркорларни янада кенг жалб этиш режалаштирилган.

Тадбирда сўзга чиққан Фарғона вилояти ҳокими ўринбосарлари Бурҳон Қўлдошев ва Шерзод Полвонов бундай эътибор ва рағбат юртимизда ногиронлиги бўлган шахсларнинг бандлигини таъминлаш, уларнинг доимий даромад манбаига эга бўлишига қаратилган амалий чора-тадбирларнинг самараси эканини таъкидлади. Бу, ўз навбатида, юртимизда ҳеч ким эътибордан четда қолмаслиги, эзгу ташаббусларни қўллаб-қувватлашга қаратилган изчил сиёсат юритилаётганидан далолат беради.

Айни пайтда вилоят бўйлаб ҳафталик доирасида белгиланган тадбирлар изчил давом этмоқда.

Ботир МАДИЁРОВ, «Халқ сўзи».