Bugun ertalabki holatga koʻra, Janubiy Koreyada kuchli yomgʻir sababli yuzaga kelgan suv toshqinlari va koʻchkilar oqibatida kamida 32 kishi halok boʻldi, 10 nafardan ortiq inson bedarak yoʻqoldi hamda minglab odamlar xavfsiz joylarga koʻchirildi.

“Yonhap” maʼlumotiga koʻra, oʻlim holatlarining aksariyati Shimoliy Kyonsang viloyatida qayd etilgan boʻlib, bu yerda 17 kishi asosan koʻchkilar va turarjoy binolarining qulashi oqibatida nobud boʻlgan va toʻqqiz nafar inson bedarak yoʻqolgan.

Bugun ertalabki soat 6 dagi holatga koʻra, 13 ta shahar va viloyatda yashab kelgan 7 ming 540 nafar kishi oʻz uylaridan xavfsiz joylarga koʻchirilgan. Mamlakatda 211 ta yoʻl yopilgan. Mustasno oʻlaroq, tezyurar poyezdlar baʼzi hududlarda harakatni davom ettirgan boʻlsada, tabiiy ofat zonasidagi barcha poyezdlar harakati toʻxtatilgan.

Janubiy Koreya ob-havo agentligi yaqin kunlarda kutilayotgan kuchli yomgʻir haqida ogohlantirmoqda.

Oʻzbekistonning Seuldagi Elchixonasiga koʻra, oʻlganlar va jarohatlanganlar orasida mamlakatimiz fuqarolari yoʻq. Vaziyat Oʻzbekiston diplomatlari nazorati ostida.