Illyustrativ foto

18-iyuldan 19-iyulga oʻtar kechasi Ukraina dronlari Rossiyaning bir qancha shaharlariga hujum uyushtirdi.

Qayd etilishicha, hujum natijasida Sheremetyevo va Domodedovo aeroportlari vaqtincha samolyotlarni qabul qilish va joʻnatishni toʻxtatdi. Shuningdek, aloqa tarmogʻiga zarar yetkazilgani tufayli 50 dan ortiq poyezd qatnovlari kechiktirilgan.

Rossiya Mudofaa vazirligi maʼlumotiga koʻra, havo mudofaa kuchlari 71 ta dronni urib tushirgan. Ulardan 13 tasi Moskvaga yaqinlashayotganida yoʻq qilingan. Shu sababli Sheremetyevo va Domodedovo aeroportlari vaqtincha samolyotlarni qabul qilish va joʻnatishni toʻxtatgan.

Moskva viloyatining Dmitrov tumanida dron qulaganidan soʻng elektr uzatish liniyasi zarar koʻrgan. Bu hodisada hech kim jabrlanmagani aytilmoqda.

Rostov viloyatida esa Kamensk-Shakhtinskiy shahriga uyushtirilgan dron hujumi natijasida bir nechta uylar yonib ketgan, bir kishi jarohat olgan. Hududdagi Kamenskiy tumanida elektr transformatori yonib ketgan, natijada qariyb 2000 kishi elektr taʼminotisiz qolgan.

Shu bilan birga Rostov viloyatida qulagan dron parchalari temiryoʻl kontakt liniyasini shikastlagan. Natijada uzoq masofali 50 dan ortiq poyezdning harakati kechiktirilgan.