Rossiyaning turli hududlarida ota-ona qarovisiz yoki ogʻir hayotiy vaziyatga tushib qolgan bir guruh oʻzbekistonlik bolalar vatanga qaytarildi. Bu haqda “Dunyo” axborot agentligi xabar berdi.

Maʼlum qilinishicha, 9–16-oktyabr kunlari ishchi guruh tomonidan Sankt-Peterburg, Chelyabinsk va Moskvada aniqlangan 16 nafar voyaga yetmagan Oʻzbekistonga qaytarilgan.

Mutasaddi vazirlik va idoralar xodimlari bolalarning shaxsiga oid maʼlumotlarni aniqladi, ularni vatanga qaytarish uchun zarur hujjatlarni rasmiylashtirdi, tibbiy koʻrikdan oʻtkazdi hamda boshqa masalalarni hal qildi. Kerakli tartib-taomillar yakunlangach, barcha bolalar Toshkentga olib kelingan.

Bundan tashqari, ishchi guruhning yaqinda olib borgan ishlari natijasida Yekaterinburg, Volgograd, Ufa, Nijniy Novgorod, Xakasiya, Moskva viloyati, Maxachqala va Novosibirsk shaharlarida ota-onasi qaramogʻisiz qolgan yana 19 nafar bola ham vatanga qaytarildi. Ular uchun ham zarur hujjatlar rasmiylashtirilib, 1-noyabr kuni Rossiyaning tegishli idoralari bilan hamkorlikda Oʻzbekistonga olib kelindi.