Oʻzbekiston Badiiy akademiyasi axborot xizmatiga koʻra, 2022-yilning 29-iyul kuni Toshkent shahrida Oʻzbekiston va Qozogʻiston tashqi ishlar vazirlari tomonidan “Oʻzbekiston Respublikasi va Qozogʻiston Respublikasi oʻrtasida diplomatik aloqalar oʻrnatilganining 30 yilligini keng nishonlash boʻyicha qoʻshma harakatlar rejasi” ishlab chiqilib, tegishli tartibda tasdiqlangan edi.

Ushbu qoʻshma rejaga binoan Qozogʻiston Respublikasi poytaxti — Ostona shahrida soʻz mulkining sultoni Alisher Navoiy haykalini oʻrnatish nazarda tutilgandi.  

Mazkur vazifa yuzasidan 2022-yil 20-dekabrda Oʻzbekiston Respublikasi Vazirlar Mahkamasining tegishli farmoyishi qabul qilinib, Oʻzbekiston Badiiy akademiyasiga haykalni bronzadan yasash va manzilga yetkazish vazifasi topshirilgan edi.

Kuni kecha ulugʻ mutafakkir bobokalonimizning haykali Ostona shahrida oʻrnatildi.

Balandligi toʻrt metrdan ortiq boʻlgan mazkur haykal Oʻzbekiston xalq rassomi, haykaltarosh Jasvant Annazarov tomonidan yaratildi.

Shuni aytish kerakki, bugungi kunga qadar Alisher Navoiy haykali dunyoning Tokio, Shanxay, Vashington, Moskva, Minsk, Boku, Mozori-Sharif, Oʻsh, Dushanbe, Seul kabi shaharlarida oʻrnatilgan. Bularning barchasi asrlar osha hikmatlari hamon barhayot boʻlgan, insoniyatni poklikka, toʻgʻrilikka, halollikka, tinchlikka, hamjihatlikka,  maʼrifatga daʼvat etgan hazrati Alisher Navoiy bobomizning ijodiga boʻlgan cheksiz ehtiromning yorqin namunasidir.