Qudratilla NAJMIDDINOV/“Xalq soʻzi”. Namangan hunarmandchiligida zargarlik alohida oʻrin tutadi. Yaqingacha zargarlik bilan qoʻl mehnati asosida shugʻullanilgan. Viloyatda uni sanoat usuliga koʻchirishga erishildi. Oʻzbek brendini dunyoga tanitishni maqsad qilgan “Gavhar jevel group” masʼuliyati cheklangan jamiyatida barcha zargarlik amaliyotlari bajarib kelinmoqda.

Birinchi bosqichdagi loyihaning qiymati 6,5 million AQSH dollariga teng boʻlib, korxonani shakllantirish jarayonida Italiya, Germaniya, Turkiya va Rossiyadan texnologik uskunalar olib kelib oʻrnatildi. Yillik ishlab chiqarish hajmi 1200 kilogrammga teng boʻlgan quvvatlar bugun toʻla harakatga keltirildi. Ayni paytda bu yerda 50 dan ziyod ishchi faoliyat koʻrsatadi. Bunga qoʻshimcha 200 ga yaqin mahalliy zargarlar kooperatsiya asosida uyushib, ish olib borilmoqda.

Korxona qisqa vaqtda faoliyatini yoʻlga qoʻyish bilan birga, oʻz mahsulotlarini ichki bozorga olib kirishga ulgurdi. Oʻtgan yili Buxoroda tashkil etilgan xalqaro zardoʻzlik va zargarlik festivalida muvaffaqiyatli ishtirok etib, “Eng yaxshi zargarlik korxonasi” nominatsiyasi boʻyicha birinchi oʻrinni egalladi. Qimmatbaho toshlar va zargarlik buyumlari eksportini qoʻllab-quvvatlash kengashi (GJEPC) tomonidan Dubay shahrida tashkil etilgan “International GEM & jevellery show” nufuzli xalqaro zargarlik “Global icon” mukofotini qoʻlga kiritdi.

— Davlatimiz rahbarining joriy yilda Namanganga tashrifi aynan, bizning korxonadan boshlandi, — deydi MCHJ rahbari Azizbek Aburasulov. — Suhbat chogʻida koʻrgazma va savdo maydonlarini oʻz ichiga olgan maxsus zargarlik markazi tashkil etish boʻyicha zarur koʻrsatma berdi. Shundan kelib chiqib, tayyorlagan loyihamiz roʻyobga chiqdi.

— Zamonaviy texnologiya vositalari bilan jihozlanadigan markaz soha vakillariga qulay va unumli mehnat qilish maydonini yaratadi, — deydi savdo-sanoat palatasi viloyat boshqarmasi raisining oʻrinbosari Mirzohid Mirzaahmedov. — Bu oʻz navbatida, ilgʻor texnologiya yordamida yuqori sifatli, raqobatbardosh buyumlar tayyorlash, milliy brendni rivojlantirish imkonini beradi. Uning negizida mingta ish oʻrni yaratiladi.

Darhaqiqat, loyiha qiymati 12 million AQSH dollariga teng va 35 sotix maydonda barpo etiladigan markazda ichki va tashqi bozorda xaridorgir tilla buyumlar, sof oltin yombilari hamda aksessuarlar ishlab chiqariladi. Oʻrnatiladigan quvvatlar yordamida yiliga 150 kilogrammgacha mahsulot tayyorlash mumkin. Uning 20 foizi MDH respublikalari, AQSH, Yaponiya, Koreya davlatlariga eksportga yuboriladi.

Ayni paytda kelgusi yilda bitkazish rejalashtirilgan markazni bunyod etishga jadal kirishilgan. Yaqinda isteʼmol bozorini qalbaki mahsulotlardan ishonchli himoya qilib, xaridorlarga toza tilla buyumlarni taqdim etadigan zargarlar markazi ishga tushiriladi.