Illyustrativ foto

Xonanda Botir Qodirov shoir Shamsiddin Sadoiyning (Toʻrayev) mualliflik huquqini buzganligi uchun sud qarori bilan 132 million soʻm miqdorida tovon va maʼnaviy zarar toʻlaydigan boʻldi. Bu haqda Adliya vazirligi xabar qildi.

Qayd etilishicha, joriy yilning iyun oyida shoir Shamsiddin Toʻrayev tomonidan fuqarolik ishlari boʻyicha Uchtepa tumanlararo sudiga mualliflik huquqlari buzilishiga chek qoʻyish, yaʼni mualliflik huquqi buzilishi natijasida yetkazilgan maʼnaviy zarar va tovon puli (kompensatsiya) undirish toʻgʻrisidagi daʼvo arizasi kiritilgan.

Sud arizasida “Davlating borida”, “Omonat” va “Tingla doʻstim” nomli sheʼrlar muallifining roziligisiz foydalanilgani va bu bilan unga maʼnaviy zarar yetkazilgani qayd etilgan.

Mazkur daʼvo arizasi boʻyicha fuqarolik ishi koʻrib chiqilib, sudning hal qiluv qaroriga asosan javobgar Botir Qodirovdan daʼvogar Toʻrayev Shamsiddin Xoʻjayevichning foydasiga BHMning 300 barobari yaʼni 112500000 soʻm miqdorida tovon puli hamda 20000000 soʻm maʼnaviy zarar undirilishi belgilandi.

Bundan tashqari, Qodirovga shoirning muallifligidagi qoʻshiqlarni efirga uzatish, ijtimoiy tarmoqlarda va boshqa platformalarda tarqatishni toʻxtatish majburiyati yuklandi.

Taʼkidlash joiz, qonunchilikka muvofiq muallif huquqbuzardan zarar qoplanishi oʻrniga bazaviy hisoblash miqdorining 20 baravaridan 1000 baravarigacha miqdorda tovon toʻlashini talab qilishga haqli hisoblanadi.