Odilbek Odamboyev/“Xalq soʻzi”. Qadimiy va navqiron Xivada Oʻzbekiston – Hindiston yoshlar forumi va Markaziy Osiyo – Xitoy yosh iqtidorlar forumi tashkil qilindi. Unda savdo-iqtisodiy, investitsiyaviy, madaniy-maʼrifiy sohalarda yaqin hamkorlik oʻrnatilgan ushbu mamlakatlar yoshlari oʻrtasida oʻzaro aloqalarni mustahkamlash boʻyicha qator taklif va tashabbuslar bildirildi.

Forum doirasida Innovatsiyalar milliy ofisi tomonidan “Barqaror rivojlanish va atrof-muhit innovatsiyalari” mavzusida panel muhokamalar boʻlib oʻtdi. Forum qatnashchilari Xivadagi Ichanqalʼa majmuasining tarixiy obidalari, muzey eksponatlari bilan tanishdi. Teatr ijodkorlari tomonidan sahnalashtirilgan “Sulton Jaloliddin” spektaklini tomosha qilishdi.

— Oʻzbekistonga birinchi bor kelishim, — deydi xitoylik talaba Chjan Xenchji. — Ichanqalʼaning betakror obidalarini koʻrib, oʻzimni ertaklar olamiga tushib qolgandek his qildim. Xivada oʻtkazilgan Markaziy Osiyo – Xitoy yosh iqtidorlar forumida oʻzbek talabalari orasidan koʻplab doʻstlar orttirdim. Samimiy mehmondoʻstlik uchun chin dildan minnatdorchilik bildiraman. Oʻzbekistonlik tengdoshlarimni Xitoyga taklif qilaman.