Foto: AP

Daniya va Grenlandiyada AQSH prezidenti Donald Trampning mashhur — MAGA kepkalariga ishora qiluvchi qizil beysbolkalar Trampning Grenlandiyani egallash haqidagi tahdidlariga nisbatan norozilik ramziga aylanmoqda. “Make America Go Away” (“Yoʻqolsin Amerika”) degan yozuv tushirilgan ushbu kepkalarda Trampning “Make America Great Again” shiori kinoya bilan qayta talqin qilinib, ijtimoiy tarmoqlar hamda ommaviy namoyishlarda keng tarqalmoqda.

Soʻnggi dam olish kunlari Kopengagenda sovuq ob-havoga qaramay oʻtkazilgan aksiyada ham ushbu shlyapalar koʻpchilik eʼtiborini tortdi. Namoyishchilar Daniya va Grenlandiya bayroqlarini koʻtarib, AQSHning hududga nisbatan daʼvolarini masxara qiluvchi qoʻlyozma shiorlar bilan chiqish qildi. Yevropa davlatlari esa Daniya va Grenlandiyani qoʻllab-quvvatlab, Arktika hududlari xavfsizligini himoya qilish zarurligini taʼkidlamoqda.

Kepkalar muallifi — Kopengagendagi vintaj kiyimlar doʻkoni egasi Yesper Rabe Tyonnesen. Uning aytishicha, 2024-yildagi ilk partiyalar deyarli sotilmagan, ammo Tramp maʼmuriyati Grenlandiya boʻyicha bayonotlarini keskinlashtirgach, talab oshgan. “Amerika delegatsiyasi Grenlandiyaga borganida, bu shunchaki hazil emasligini angladik — bu real haqiqat ekan”, deydi u.

Natijada, bir hafta ichida barcha kepkalar sotilib ketgan va Tyonnesen “bir necha ming dona”ga yangi buyurtma bergan. Uning ilk dizaynida yana bir qochirim bor edi: “Nu det NUUK!” — bu dat tilidagi “Nu det nok” (“Yetar endi”) iborasining Grenlandiya poytaxti Nuuk nomi bilan kinoyali talqini.

Namoyish ishtirokchilari kepkalar orqali ham jiddiy, ham hazilomuz munosabatni ifoda etmoqda. “Men Grenlandiyani qoʻllab-quvvatlash va AQSH prezidentini yoqtirmasligimni koʻrsatmoqchiman”, dedi kopengagenlik Lars Hermansen. Boshqa ishtirokchi Kristian Boye esa namoyish yengil kayfiyatda oʻtganini, ammo xabari juda jiddiy ekanini taʼkidlab, “ular yurti bosib olinishi bilan qoʻrqitilmoqda — buni mutlaqo qabul qilib boʻlmaydi”, dedi.