Foto: Xalq so‘zi

Fargʻona shahrida fargʻonalik va qirgʻizistonlik tadbirkorlar ishtirokida yuzma-yuz muloqot boʻlib oʻtdi. Unda umumiy qiymati 4 million dollardan ortiq boʻlgan hamkorlik kelishuvlariga erishildi

USAID dasturi doirasida mintaqaviy va transchegaraviy savdoni kengaytirish orqali qishloq xoʻjaligida yangi ish oʻrinlari va qoʻshimcha daromad manbalarini yaratish juda ham istiqbollidir.

Dastur doirasidagi «Agrosooda» loyihasi boʻyicha kuni kecha Qirgʻiziston Respublikasining Oʻsh, Batken, Jalolobod viloyatlarida faoliyat olib borayotgan 20 nafardan ziyod tadbirkorlar ikki kunlik tashrif bilan Fargʻona viloyatiga kelishdi.

Tashrif rejasiga koʻra, mehmonlar dastlab viloyatning Quva tumanida joylashgan mevani qayta ishlash korxonasi, Oltiariq tumanida yaqinda tashkil etilgan 1000 gektarlik uzumzor, logistika markazi va muzlatgichli omborlar faoliyati bilan tanishdilar.

Bugun Fargʻona viloyati hokimligi hamda Qirgʻizistondagi «Datka» savdo-ishlab chiqarish xoldingi tashabbusi bilan ikki davlat tadbirkorlari ishtirokida biznes uchrashuv tashkil etildi. Unda Savdo-sanoat palatasi viloyat hududiy boshqarmasi boshligʻi Alisher Soliyev, viloyat Investitsiyalar va tashqi savdo boshqarmasi masʼul rahbarlari, qirgʻizistonlik rasmiylar ishtirok etdi.

— Ayni kunlarda mamlakatlarimiz oʻrtasida savdo-iqtisodiy, investitsiyaviy hamkorlik doirasida hududlar kesimida koʻplab istiqbolli loyihalar amalga oshirilmoqda, — deydi Oʻzbekiston Respublikasi Savdo-sanoat palatasi Fargʻona viloyati hududiy boshqarmasi boshligʻi Alisher Soliyev. — Bugungi uchrashuv samarasi sifatida ikki davlat tadbirkorlari oʻrtasida umumiy qiymati 4 million dollardan ziyod boʻlgan 4 ta savdo shartnomasi hamda 8 ta memorandum imzolangani eʼtiborga sazovordir.

Botir Madiyorov, “Xalq soʻzi”.