Toshkent viloyati va Toshkent shahrida yer maydonlari bilan bogʻliq korrupsion holatlar aniqlandi. Bu haqida “Xavfsizlik” Telegram-kanali xabar berdi.

Unda aytilishicha, Toshkent viloyati hokimligining investitsiyalar, sanoat va savdo boshqarmasi bosh mutaxassisi, Toshkent shahrida xususiy amaliyot bilan shugʻullanuvchi notarius yordamchisi, 1980-yilda tugʻilgan rieltor va 1996-yilda tugʻilgan shaxs oʻzaro til biriktirib, tadbirkorlik bilan shugʻullanmoqchi boʻlgan fuqaroning ishonchiga kiradi.

Ular Chirchiq shahrida joylashgan va ulgurji savdo bilan shugʻullanuvchi MCHJ balansidagi 8,5 gektar yer maydonini fuqaroga 6 million 800 ming AQSH dollariga sotish hamda ushbu hududga elektr, gaz taʼminoti, oqova suv yoʻllarini oʻtkazish uchun texnik shart va ruxsatnomalar, shuningdek, qurilish ishlarini amalga oshirish uchun tegishli ruxsatnoma olib berish evaziga 500 ming AQSH dollari, jami 7 million 300 ming AQSH dollari talab qilgan.

Davlat xavfsizlik xizmati, Ichki ishlar vazirligi va Iqtisodiy jinoyatlarga qarshi kurashish departamenti xodimlari hamkorligida oʻtkazilgan tezkor tadbirda, ushbu shaxslar soʻralgan pul mablagʻi hisobidan 160 ming AQSH dollarini olgan vaqtlarida ashyoviy dalillar bilan qoʻlga olingan.

Hozirda mazkur shaxslarga nisbatan Jinoyat Kodeksining 168-moddasi 4-qismi “a” bandi va 28,211-moddasi 3-qismi “a” bandi bilan jinoyat ishi qoʻzgʻatilib, tergov harakatlari olib borilmoqda.

Shu kabi yana bir holatda esa Toshkent shahrida yashovchi, 1986-yilda tugʻilgan fuqaro 2022-yilning oktyabr oyida maishiy xizmat koʻrsatish shoxobchasi qurish maqsadida Yashnobod tumanida joylashgan 80 m² yer maydonini “E-auksion” dasturi orqali yutib, 49-yil muddatga ijaraga oladi.

Ammo, turli sabablarga koʻra, qurilish ishlari toʻxtab qolib, yer maydonidan uzoq muddat davomida foydalanilmaganligi bois, 2025-yilning sentyabr oyida Yashnobod tumani hokimligi tomonidan ijara shartnomasini muddatidan oldin bekor qilish boʻyicha fuqarolik sudiga daʼvo arizasi kiritiladi. Lekin, tadbirkor tomonidan asoslantiruvchi hujjatlar taqdim etilgach, sud uning foydasiga hal qiluv qaror qabul qiladi.

Sud jarayonlarida daʼvogar sifatida qatnashgan Yashnobod tumani hokimligi bosh yuriskonsulti esa oʻz xizmat mavqeidan foydalanib, sudning hal qiluv qarori ustidan apellyatsiya shikoyati bermaslik evaziga tadbirkordan 5 ming AQSH dollari talab qiladi.

Davlat xavfsizlik xizmatining Toshkent shahar boʻyicha boshqarmasi xodimlari tomonidan Bosh prokuratura huzuridagi Departamentning shahar boshqarmasi bilan hamkorlikda oʻtkazilgan tezkor tadbirda, hokimlik bosh yuriskonsulti tamagirlik yoʻli bilan 4 ming AQSH dollari olgan vaqtida ashyoviy dalillar bilan ushlangan.

Hozirda mazkur shaxsga nisbatan Jinoyat Kodeksining 210-moddasi 2-qismi “v” bandi bilan jinoyat ishi qoʻzgʻatilib, “qamoq” ehtiyot chorasi qoʻllanilgan.