Sogʻliqni saqlash vaziri Amrillo Inoyatov Yaponiyaning Oʻzbekistondagi Favqulodda va Muxtor elchisi Takashi Xatori bilan muloqot oʻtkazdi.

Uchrashuvda ikki mamlakat oʻrtasida tibbiyot sohasida olib borilayotgan hamkorlik istiqbollari haqida soʻz bordi.

Ayni paytda yurtimizda sogʻliqni saqlash tizimi boʻyicha Yaponiya bilan hamkorlikda qator qoʻshma loyiha va dasturlar amalga oshirilmoqda.

Xususan, JICA tashkiloti grant hamda kreditlari asosida Respublika ixtisoslashtirilgan nevrologiya va insult ilmiy-amaliy tibbiyot markazini qurish, jihozlash, Toshkent pediatriya tibbiyot instituti Nukus filialining moddiy-texnik bazasini mustahkamlash, yuqumli boʻlmagan kasalliklarning oldini olish va nazorat qilish kabi yirik loyihalar roʻyobga chiqarilyapti.

Yapon mutaxassislari yurtdoshlarimiz bilan oʻz tajribalarini oʻrtoqlashib kelyapti. Chunonchi, kunchiqar mamlakatning 150 nafardan ortiq vakillari yuqumli kasalliklar profilaktikasi boʻyicha Oʻzbekistonda ish olib bordi. Shuningdek, 200 nafardan ziyod tibbiyot xodimlarimiz u yerda malaka oshirib qaytdi.

Bundan tashqari, JICA bilan birgalikda Oʻzbekiston tibbiyot muassasalariga Yaponiyadan koʻngillilarni joʻnatish doirasida hamkorlik yoʻlga qoʻyilgan.

Umuman, Yaponiya Oʻzbekistonning ishonchli hamkori boʻlib, ikki davlat oʻrtasida tibbiyot ilm-fani, kadrlar tayyorlash, kasalliklar muolajasi va profilaktikasi, koronavirusga qarshi kurashish kabi qator yoʻnalishlarda samarali aloqalar mustahkamlanmoqda.

Bugungi muloqot davomida ushbu munosabatlarni yanada rivojlantirish yuzasidan Oʻzbekiston tomoni bir necha takliflarni ilgari surdi.

Jumladan, sogʻliqni saqlashni boshqarish, tibbiyot injiniringi, axborot texnologiyalari va tibbiy sugʻurta tizimi yoʻnalishlarida tajriba almashish uchun qisqa va uzoq muddatli oʻquv kurslarini ishlab chiqish, tegishli tibbiyot oliy oʻquv yurtlari, kollejlari va shifoxonalarni tanlab olib, ularga yapon tibbiy menejmentini joriy qilish orqali kunchiqar mamlakatning samarali yutuqlarini tatbiq etish rejalashtirilmoqda.

Shuningdek, Yaponiyada ikki davlat mutaxassislari ishtirokida tibbiyot, ilm-fan va farmatsevtika sohalarini rivojlantirishga qaratilgan Forum oʻtkazish taklifi oʻrtaga tashlandi.