Хабарингиз бор, бокс бўйича ҳаваскорлар ўртасида жаҳон чемпиони, айни пайтда профессионал боксда фаолият олиб бораётган ҳамюртимиз Шаҳрам Ғиёсов 25 август куни Мексикада ўзининг навбатдаги жангини ўтказди.

Шу куни ҳамюртимиз колумбиялик таниқли боксчи Дарлейс Пересга қарши рингга кўтарилди ва номдор рақибини атиги 30 сонияда, яъни биринчи зарбанинг ўзидаёқ нокаутга учратди. Таъкидлаш керак, Дарлейс Перес профессионал бокснинг нуфузли WBA йўналиши енгил вазн тоифасида собиқ жаҳон чемпиони саналади.

Проф боксда чемпионлик сари дадил қадам ташлаётган Шаҳрам Ғиёсов шу тариқа ўзининг 9-жангида ҳам зафар қучди. Бухоролик боксчимиз 29 август куни юртимизга қайтиб келади. Шаҳрам Ғиёсов Дарлейс Перес устидан қозонган ғалабасини халқимизнинг энг улуғ ва энг азиз байрами, мустақиллигимизнинг 28 йиллигига бағишлашини маълум қилди. Бу ҳақда Жисмоний тарбия ва спорт вазирлиги матбуот хизмати хабар берди.