2018 yilda O‘zbekistonda 776ta yangi xorijiy korxona ish boshladi

14:52 13 Iyun 2018 Iqtisodiyot
132 0

2018 yilning yanvar-may oyida xorijiy kapital ishtirokidagi ro‘yxatdan o‘tgan yangi korxonalarning soni 776 tani tashkil qilgan. Bu haqda Davlat statistika qo‘mitasi ma’lumotlarida ko‘rsatib o‘tilgan.

Qayd qilinishicha, bu ko‘rsatkich o‘tgan yilning shu davriga nisbatan 496 taga ko‘paygan. Aniqroq aytganda 2,8 baravarga oshgan.

Bunda, Rossiya rezidentlari kapitali ishtirokida – 158 ta, Turkiya – 118 ta, Qozog‘iston – 87 ta, Xitoy 106 ta va Janubiy Koreya – 70 ta yangi korxonalar ro‘yxatdan o‘tgan. Shuningdek, 2018 yilda Afg‘oniston Islom Respublikasi, Hindiston, Germaniya Federativ Respublikasi, Ukraina, Ozarboyjon va boshqa davlatlar rezidentlari qo‘shma faoliyatga qiziqish bildirdilar.

Yangi tashkil etilgan xorijiy kapital ishtirokidagi korxonalarni iqtisodiy faoliyat turlari bo‘yicha ko‘riladigan bo‘lsa, asosan sanoatda 256 ta, savdoda 207 ta, qurilishda 75 ta, qishloq, o‘rmon va baliq xo‘jaligida 65 ta va boshqa faoliyat turlarida 173 ta xorijiy kapital ishtirokidagi korxonalar yangi tashkil etilgan.

2018 yil 1 iyun holatiga O‘zbekistonda faoliyat ko‘rsatayotgan xorijiy kapital ishtirokidagi korxonalar soni 6127 tani tashkil etdi. O‘tgan yilning shu davriga nisbatan 933 taga yoki 18,0%ga o‘sgan. Shuningdek Xorijiy kapital ishtirokidagi faoliyat ko‘rsatayotgan korxonalardan 3374 tasi qo‘shma korxonalar, 2753 tasi esa xorijiy korxonalar hisoblanadi.

Xorijiy kapital ishtirokidagi korxonalarning asosiy qismi Toshkent shahar 3949 ta (64,5%), Toshkent viloyati 677 ta (11,0%) va Samarqand viloyatlari 331 ta (5,4%) hissalariga to‘g‘ri keladi. Eng kam xorijiy kapital ishtirokida tashkil etilgan korxonalar Xorazm viloyati 51 ta (0,8%), Qashqadaryo viloyati 58 ta (0,9%), Navoiy viloyati 69 ta (1,1%) va Surxondaryo viloyati 89 ta (1,5%) hissalariga to‘g‘ri keladi. Bu esa mazkur hududlarda xorijiy hamkorlar bilan ishlashni, investitsiyalar jalb etish borasida amalga oshirilishi lozim bo‘lgan ishlarni yanada rivojlantirishni talab etadi.

Agar faoliyat yuritayotgan xorijiy kapital ishtirokidagi korxonalarni iqtisodiy faoliyat turlari kesimida ushbu ma’lumotlarni 2018 yil 1 iyun holatiga ko‘rsak, eng ko‘p sanoatda 2596 ta (42,4%), savdoda 1265 ta (20,6%) hamda boshqa faoliyat turlarida esa 1051 ta (17,2%) tashkil qilgan, eng kamlari esa sog‘liqni saqlash va ijtimoiy xizmatlar ko‘rsatishda 86 ta (1,4%), axborot va aloqada 151 ta (2,5%), tashish va saqlashda 180 ta (2,9%) qishloq, o‘rmon va baliq xo‘jaligi 209 ta (3,4%), yashash va ovqatlanish bo‘yicha xizmatlarda 243 ta (4,0%) va qurilishda 346 ta (5,6%) tashkil qilgan.

Shundan ko‘rinib turibdiki, faoliyat yuritadigan xorijiy kapital ishtirokidagi korxonalarning asosiy qismi sanoat va savdo faoliyat turiga to‘g‘ri kelarkan. Shuningdek, eng kam ulushi esa sog‘liqni saqlash va ijtimoiy xizmatlar hamda axborot va aloqa faoliyat turlariga to‘g‘ri keladi.


Izohlar

Hozircha hech kim fikr bildirmagan. Balki Siz birinchilardan bo'larsiz?