«Менинг Биринчи Президентим»
  • 08 Сентябрь 2017

«Менинг Биринчи Президентим»

Юртимиз ёшлари ўртасида шу номда ўтказилган иншолар танлови якунига етди.

Ўзбекистон давлат жаҳон тиллари университетида “My First President” (“Менинг Биринчи Президентим”) инглиз тилидаги иншолар тўпламининг тақдимоти ҳамда унда энг яхши ижодий ишлари билан қатнашган йигит-қизларни тақдирлаш маросими бўлиб ўтди.

Мазкур танлов Ўзбекистон Республикаси Президенти ҳузуридаги Ўзбекистон Республикасининг Биринчи Президенти Ислом Каримов номидаги илмий-маърифий мемориал мажмуа, Ислом Каримов номидаги Республика хайрия жамоат фонди, Олий ва ўрта махсус таълим вазирлиги, Ўзбекистон давлат жаҳон тиллари университети томонидан ташкил этилди.

Анжуман аввалида Ўзбекистон Республикасининг Биринчи Президенти Ислом Каримов ҳаёти ҳамда фаолиятига бағишланган фотокўргазма ташриф буюрувчилар эътиборига ҳавола қилинди. Шунингдек, “Биринчи Президент ва ёшлар” деб номланган видеоролик намойиши бўлиб ўтди.

Тадбирда сўзга чиққан Биринчи Президентимизнинг рафиқаси Татьяна Каримова ҳамда бошқалар Ислом Абдуғаниевич Каримов ўз халқини чексиз муҳаббат билан севгани, умрининг сўнгги кунларига қадар бутун ҳаётини Ўзбекистонга хизмат қилишга бағишлагани, ёшларга доимо меҳр-эътибор кўрсатгани, бу улуғ инсоннинг сўнмас хотираси миннатдор юртдошларимиз, бутун халқимиз қалбида абадий сақланиб қолишини таъкидлади.

— Ислом Каримов хотирасига бағишлаб ташкил этилган иншолар танловида олий, ўрта махсус, касб-ҳунар таълими муассасалари талабалари, мактаб ўқувчилари қатнашди, — дейди танлов ташкилотчиларидан бири, “Ўзбекистонда хорижий тиллар” номли илмий-методик электрон журнали раҳбари Гулмира Шукурова. — Айтиш керакки, юрти-мизнинг барча ҳудудидан бу ижодий кўрикка қизиқиш юқори бўлди. Танлов ҳайъати томонидан инглиз тилидаги 500 дан зиёд иншолар кўриб чиқилиб, уларнинг 36 таси тўпламга киритилди.

Саидазиз Аъзамов — Ўзбекистон давлат жаҳон тиллари университетида таҳсил олади. Унинг ёзган ижодий иши самимийлиги билан алоҳида эътироф этилиб, “Менинг Биринчи Президентим” тўпламига киритилди.

— Барчамиз Биринчи Президентимизнинг “Биз ҳеч кимдан кам эмасмиз, ҳеч кимдан кам бўлмаймиз” деган доно сўзлари нақадар муҳимлигини чуқур англаб, доимо шунга интиламиз, — дейди Саидазиз. — Инглиз тилида ёзган ижодий ишим кўпчиликка манзур бўлиб, тўпламдан жой олганидан хурсандман.

Тадбир якунида танлов ғолибларига махсус дипломлар ва совғалар топширилди.

Омонулла ФАЙЗИЕВ,

«Халқ сўзи» мухбири.

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn